• Yaratildi: 11.03.2023
• Yangilandi: 13.03.2023
• O'qildi: 3935

Konchilik ishining ilk ensiklopediyasi o‘zbek tiliga tarjima qilinib, chop etildi

Navoiy kon-metallurgiya kombinati tomonidan konchilik sohasiga oid ilmiy va ilmiy-ommabop adabiyotlar chop etib kelinmoqda.

Kombinat mutaxassislari tomonidan 1494-1555-yillarda yashagan mashhur nemis olimi, mineralog, metallurg, shifokor va faylasuf Georgiy Agrikolaning “Konchilik ishi va metallurgiya haqida o‘n ikki kitobda” asari ilk bor rus tilidagi nashrdan o‘zbek tiliga tarjima qilinib, yaqinda nashr etildi. Mazkur asar konchilik ishining ilk ensiklopediyasi hisoblanadi.

Nemis olimining ushbu asari besh asr oldin yozilganiga qaramasdan, muallif sohadagi chuqur bilimga ega ekanligidan dalolat beradi. Konchilarning bir necha avlodi ushbu kitobdan foydalanib, konchilik ishi asoslarini o‘rganib kelmoqda.

Kitobni o‘qigan konchi va bu sohaning yosh olimlarida ilm-fanga sodiqlik, yangilikka intilish, so‘nggi ilmiy yutuqlarni amaliyot bilan uyg‘unlashtira olish, keng ilmiy dunyoqarash kabi bugungi davr ilmiy tadqiqotchiligi uchun ham nihoyatda dolzarb va zarur fazilatlarni o‘zlarida shakllantirish ishtiyoqi tug‘ilishi kitobning ahamiyatini yana-da oshiradi.

Taʼkidlash joizki, G.Agrikola metall va minerallarni tanlab eritmaga o‘tkazish jarayonlarini chuqur o‘rganib, texnologik tizimlarni yaratish, o‘zi bilmagan holda, o‘sha davrdayoq sulfidli minerallarni biologik oksidlanishini kashf qildi.

Mazkur asarni o‘zbek tiliga tarjima qilishdan maqsad – yoshlar, talabalar, muhandislar, tadqiqotchilar hamda metallurgiya tarixi bilan qiziquvchilarga kengroq imkoniyatlar yaratish, ularni noyob maʼlumotlar jamlangan bilim xazinasidan bahramand etishdan iboratdir.

“NKMK” AJ Matbuot xizmati.