• Yaratildi: 07.03.2023
• Yangilandi: 09.03.2023
• O'qildi: 3982

“NKMK” AJning Kanadaning Toronto shahridagi PDAC konchilik sanoati xalqaro anjumandagi ishtiroki to‘g‘risida

PRESS-RELIZ

“Navoiy kon-metallurgiya kombinati” aksiyadorlik jamiyati 5-8-mart kunlari PDAC (Kanada konchilar va oltin izlovchilar assotsiatsiyasi)ning Toronto shahrida o‘tkazilayotgan konchilik sanoatidagi yetakchi xalqaro anjuman va ko‘rgazmalarida ishtirok etmoqda. Mazkur anjuman har yili konchilik sanoatidagi xalqaro investorlar va ekspertlarni birlashtiradi va konchilik kompaniyalari va loyihalari taqdimoti uchun eng muhim global platforma hisoblanadi.

Jahonda oltin ishlab chiqaruvchi yirik kompaniyalar to‘rttaligiga kiradigan va O‘zbekiston Respublikasi Prezidentining farmoniga muvofiq keng ko‘lamli transformatsiya dasturini amalga oshirayotgan “NKMK” AJ joriy yilda anjuman doirasida ko‘rgazma stendi bilan qatnashmoqda. Shuningdek, dunyodagi eng yirik birjalardan biri bo‘lgan va konchilik sanoati ko‘plab korxonalarining aksiyalari sotiladigan Toronto fond birjasi prezidenti taklifiga binoan kombinat investitsiya banklari, fondlari va potensial hamkorlar uchun davra suhbati o‘tkazdi.

Davra suhbatida “NKMK” AJ bosh direktorining transformatsiya masalalari bo‘yicha birinchi o‘rinbosari Yevgeniy Antonov kompaniya taqdimotini o‘tkazdi va uchrashuv ishtirokchilarining savollariga javob berdi. NKMK jahonning oltin ishlab chiqaruvchi yirik kompaniyasi sifatida ishtirokchilarning eʼtiborini jalb qildi. Investorlar kompaniyaning ishlab chiqarish va moliyaviy ko‘rsatkichlari, uning barqaror rivojlanish siyosati, transformatsiya dasturining amalga oshirilishi va strategik rejalariga qiziqish bildirdilar. Shuningdek, Yangi O‘zbekistonning ochiqlanayotgan iqtisodiyoti, respublikamizga xorijiy investorlarni jalb etish va ularning ishlashi uchun yaratilayotgan qulay shart-sharoitlar jahon banklari va fondlarining vakillarida katta qiziqish uyg‘otdi.

Davra suhbati yakunlari bo‘yicha Yevgeniy Antonov quyidagilarni bildirdi:

- Biz xalqaro investitsion hamjamiyatning nafaqat kompaniyamizga, balki O‘zbekistonga, mamlakatimiz rahbariyatining xorijiy investorlarni jalb etishga qaratilgan siyosatiga katta qiziqish bildirayotganini ko‘rdik. Davra suhbati ishtirokchilarida kompaniyamiz ko‘lami katta taassurot qoldirdi va biz “NKMK” AJda amalga oshirilayotgan transformatsiya jarayonlariga ijobiy munosabatning guvohi bo‘ldik. Ishonchimiz komilki, bu muloqot davom etadi va davra suhbati ishtirokchilari kelajakda O‘zbekiston iqtisodiyotiga investitsiyalarni kiritadilar.

“NKMK” AJ Matbuot markazi.