• Yaratildi: 07.03.2023
• Yangilandi: 10.03.2023
• O'qildi: 3764

Yuksak davlat mukofoti muborak bo‘lsin!

Joriy yil 6-mart kuni O‘zbekiston Respublikasi Prezidentining “8-mart – Xalqaro xotin-qizlar kuni munosabati bilan mukofotlash to‘g‘risida”gi farmoniga muvofiq bir guruh xotin-qizlar yuksak davlat mukofotlari bilan taqdirlandilar. Ular orasida “NKMK” AJ Navoiy mashinasozlik zavodi temirchilik-presslash sexi mashinisti Zulfiya Ahmedova ham borligi butun jamoamizni quvontirib yubordi.

Zulfiya Ahmedova qo‘shaloq mukofot – “Mehnat shuhrati” ordeni va “Moʻtabar ayol” ko‘krak nishoniga sazovor bo‘ldi. Bu, albatta, kombinatda  mehnat qilayotgan 6 ming nafardan ziyod xotin-qizlar faoliyati, kasb egasining fidokorona xizmatlariga berilgan munosib bahodir.

Zulfiya Ahmedova 2001-yildan buyon kombinat tizimida ishlab kelayapti. Navoiy mashinasozlik zavodida ko‘plab yillar davomida korxonaning tozalik-ozodaligini taʼminlashga sidqidildan xizmat qildi. Mashinistlik kasbiga bo‘lgan qiziqishi hayotiga katta o‘zgarishlarni olib kirdi. U 2009-yildan buyon Temirchilik-presslash sexida mashinist bo‘lib ishlab kelmoqda. Mana o‘n to‘rt yildirki, u o‘z kasbini sharaflab, halol mehnati ortidan jamoada hurmat-eʼtibor qozonib kelmoqda.

Zulfiya Ahmedovani “Mehnat shuhrati” ordeni va “Moʻtabar ayol” ko‘krak nishoniga sazovor bo‘lgani bilan chin qalbdan tabriklaymiz.

“NKMK” AJ Matbuot xizmati.