• Yaratildi: 24.02.2023
• Yangilandi: 24.02.2023
• O'qildi: 6293

Korxonalarda xodimlar uchun test sinovlari o‘tkazilmoqda

Navoiy kon-metallurgiya kombinatida inson hayoti, sog‘ligi bilan bog‘liq bo‘lgan mehnat muhofazasi va xavfsizlik texnikasini taʼminlash muhim ahamiyat kasb etadi. Kombinatda har bir ishchi-xodimni ishga qabul qilish va ish jarayonida mehnat muhofazasi va xavfsizlik texnikasining muhim talablariga amal qilish bo‘yicha sinovlar o‘tkazilmoqda.

Mehnat muhofazasi va xavfsizlik texnikasi bosh boshqarmasi, Axborot-kommunikatsiya texnologiyalari boshqarmasi xodimlarining innovatsion yondashuvi asosida mehnat muhofazasi va xavfsizlik texnikasi korporativ portali ishga tushirildi. Ushbu portalda kombinat ishchi-xodimlari mehnat muhofazasi sohasidagi meʼyoriy-huquqiy hujjatlar bilan tanishishlari, xavfsizlik qoidalariga rioya qilish bo‘yicha video qo‘llanmalarni ko‘rishlari, shuningdek, onlayn testdan o‘tish orqali o‘z bilimlarini sinab ko‘rishlari mumkin.

Tajriba-sinov tariqasida Markaziy kon boshqarmasi va Zarafshon qurilish boshqarmasi bo‘linmalarida dastlabki jarayonlar boshlab yuborildi. Jumladan, shu yilning mart oyida Zarafshon qurilish boshqarmasining 157 nafar, 2-gidrometallurgiya zavodining 379 nafar  muhandis-texnik xodimlarini “Naryad tizimi” bo‘yicha test sinovlaridan o‘tkazish rejalashtirilgan. Shu davrga qadar to‘rtta bo‘linmada test sinovlari o‘tkazilib, yetarli ball to‘play olmagan 45 nafar xodim mazkur yo‘nalishlar bo‘yicha qayta o‘qitishga tavsiya etildi.

Shuningdek, Nurota tumani hududidagi “Pistali” koni qurilish maydonida faoliyat olib borayotgan “Sanoatelektrmontaj” trestining 40 nafar xodimi ham test sinovidan o‘tkazilib, ularning bilim va ko‘nikmalari baholandi.     

Bundan asosiy maqsad ishchi-xodimlarning mehnat muhofazasi va xavfsizlik texnikasiga oid bilimlarini oshirib borish, ishlab chiqarishda yuzaga kelishi mumkin bo‘lgan baxtsiz hodisalar oldini olishga qaratilgan.

 “NKMK” AJ Matbuot xizmati.