• Yaratildi: 23.02.2023
• Yangilandi: 23.02.2023
• O'qildi: 3663

Raqamlashtirilgan yagona boshqaruv markazi ishga tushirildi

Bugungi kunda “Navoiy kon-metallurgiya kombinati” aksiyadorlik jamiyatida ishlab chiqarish jarayonlariga raqamli texnologiyalar, zamonaviy axborot tizimlari hamda dasturiy mahsulotlarni joriy etish bo‘yicha keng ko‘lamli ishlar amalga oshirilmoqda.

Kombinat mutaxassislari tomonidan bu borada tatbiq etilayotgan innovatsion yechimlar korxonalar faoliyati, transportlar harakatini yagona axborot makoniga integratsiyalash, maʼlumotlar bazasini yaratish, ishlab chiqarish sarf-xarajatlarini kamaytirishga xizmat qilmoqda.

Yaqinda kombinatda raqamlashtirish bo‘yicha olib borilayotgan ishlar soni yana bittaga oshdi. Markaziy kon boshqarmasida ishlab chiqarishning raqamlashtirilgan yagona boshqaruv markazi ishga tushirildi. 2-gidrometallurgiya zavodida joylashgan mazkur markazning asosiy vazifasi geologik-qidiruv ishlari, maʼdanni qazib olish, tashish va gidrometallurgiya zavodlarida qayta ishlash jarayonlarini to‘liq kuzatib borish, tahlil qilish va boshqarishdan iboratdir.

Ushbu markazga o‘rnatilgan 10 ta videomonitorlar orqali Markaziy kon boshqarmasi bo‘linmalari faoliyati, transportlar harakatini onlayn kuzatib borish, ishlarni muvofiqlashtirish, yuzaga kelishi mumkin bo‘lgan muammolarni tezkor aniqlash va bartaraf etish uchun katta imkoniyatlar yaratildi. Ayni paytda markazda kecha-yu kunduz ish tartibi yo‘lga qo‘yilib, o‘n nafardan ortiq malakali mutaxassislar doimiy faoliyat olib bormoqda.  

Axborot-kommunikatsiya texnologiyalari keng joriy etilishi kombinatda ish sifati va samaradorligini oshirish, faoliyatga raqamlashtirish tizimini joriy etish orqali inson omilini kamaytirish, tannarxni pasaytirish, ishlab chiqarishda to‘xtalishlar oldini olishni taʼminlamoqda.

“NKMK” AJ Matbuot xizmati.