• Yaratildi: 25.01.2023
• Yangilandi: 25.01.2023
• O'qildi: 3690

“SRK Consulting” xalqaro konsalting kompaniyasi bilan uchrashuvlar davom etmoqda

Avval xabar berganimizdek, 2023-yilning 23-26-yanvar kunlari “Navoiy kon-metallurgiya kombinati” aksiyadorlik jamiyati boshqarmasida kombinat rahbariyati va mutaxassislarining “SRK Consulting” xalqaro konsalting kompaniyasi vakillari bilan uchrashuvlari o‘tkazilmoqda.

Uchrashuvlarda “NKMK” AJni Oltin bo‘yicha Butunjahon Kengashining Oltin ishlab chiqarishga mas’uliyatli yondashuv tamoyillari (“RGMP”) va Sianidlarga munosabat xalqaro kodeksi (“ICMC”)ga muvofiqlashtirish bo‘yicha “Yo‘l xaritasi”ni ishlab chiqish va amalga oshirish bo‘yicha umumiy strategiya muhokama etilmoqda.

25-yanvar kuni bo‘lib o‘tgan uchrashuvda “Ijtimoiy masalalar: mahalliy aholi sog‘ligini saqlash, inson huquqlari va nizolar, mehnat munosabatlari, mahalliy vakillik va boshqaruv organlari bilan ishlash” mavzusiga bag‘ishlandi. Uchrashuvda konsultantlar Oltin ishlab chiqarishga mas’uliyatli yondashuvning asosiy tamoyillaridan (“RGMP”) biri inson huquqlari ekanligi ta’kidlashdi. Birinchi audit bo‘yicha oraliq hisobot yuqorida qayd etilgan tamoyilga erishish uchun Birlashgan Millatlar Tashkilotining biznes va inson huquqlari bo‘yicha rahbarlik tamoyillari (“UNGPs”), Inson huquqlari va xavfsizligining ixtiyoriy tamoyillari va Oltin ishlab chiqarish jarayonida keskin nizolarga aralashmaslik standartlariga to‘la va qat’iy rioya qilish zarurligini ko‘rsatmoqda.

Kombinat va “SRK Consulting” konsalting kompaniyasi vakillari o‘rtasida hozirgacha o‘tgan va 26-yanvar kuni ham davom etadigan uchrashuvlarning yakunlari bo‘yicha “NKMK” AJ faoliyatini xalqaro standartlarga muvofiqlashtirish bo‘yicha “Yo‘l xaritasi” tasdiqlanadi.

“NKMK” AJ Matbuot xizmati.