• Yaratildi: 23.01.2023
• Yangilandi: 15.02.2023
• O'qildi: 4373

Xalqaro standartlarga muvofiqlikni ta’minlash bo‘yicha “Yo‘l xaritasi”ni ishlab chiqish va amalga oshirish muhokama qilinmoqda

2023-yilning 23-26-yanvar kunlari “Navoiy kon-metallurgiya kombinati” aksiyadorlik jamiyati boshqarmasida kombinat rahbariyati va mutaxassislarining “SRK Consulting” xalqaro konsalting kompaniyasi vakillari bilan uchrashuvlari o‘tkazilmoqda.

Uchrashuvlarda “NKMK” AJni Oltin bo‘yicha butunjahon Kengashining Oltin ishlab chiqarishga masʼuliyatli yondashuv tamoyillari (“RGMP”) va Sianidlarga munosabat xalqaro kodeksi (“ICMC”)ga muvofiqlashtirish bo‘yicha “Yo‘l xaritasi”ni ishlab chiqish va amalga oshirish bo‘yicha umumiy strategiya muhokama qilinadi.

Taʼkidlash kerakki, “SRK Consulting” kompaniyasi 2022-yilning oktyabr oyida kombinat ishlab chiqarish korxonalarining Oltin ishlab chiqarishga masʼuliyatli yondashuv tamoyillari (“RGMP”) va Sianidlarga munosabat xalqaro kodeksi (“ICMC”)ga muvofiqligining auditini o‘tkazish uchun tanlangan edi. Konsalting kompaniyasi auditni o‘tkazish uchun xalqaro va mahalliy ekspertlar guruhini tuzdi.

23-yanvar kuni – “NKMK” AJ rahbariyati va mutaxassislarining “SRK Consulting” kompaniyasi vakillari bilan uchrashuvlarining birinchi kunida shu paytgacha o‘tkazilgan birinchi audit bo‘yicha oraliq hisobot taqdim etildi. Auditning asosiy maqsadi yuqoridagi xalqaro standartlarga muvofiqlikka erishish uchun “Yo‘l xaritasi”ni ishlab chiqishdan iborat.

Audit 2023 va 2024-yillarda biznesni yuritish tamoyillari, xavfsizlik va mehnat muhofazasi, siyanidni boshqarish, suv resurslarini oqilona boshqarish, taʼsirni ekologik nuqtai-nazar va ijtimoiy jihatdan baholash, mahalliy hamjamiyatlarga taʼsir qilish, mahalliy aholi bilan istiqbolli va doimiy hamkorlik, biologik xilma-xillik va iqlim o‘zgarishiga moslashish masalalariga alohida eʼtibor qaratish lozimligini ko‘rsatmoqda.   

“Yo‘l xaritasi”ni ishlab chiqish va amalga oshirish bo‘yicha umumiy strategiya muhokamasi 26-yanvargacha davom etadi.

“NKMK” AJ Matbuot xizmati.