• Yaratildi: 16.11.2020
• Yangilandi: 02.12.2020
• O'qildi: 975

Xotin-qizlar muammolari davlat e’tiborida

2019 yilda qabul qilingan O‘zbekiston Respublikasining “Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi, "Xotin-qizlarni tazyiqlar va zo‘ravonlikdan himoya qilish to‘g‘risida”gi Qonunlari mamlakatimizda gender tenglikni, xotin-qizlar va erkaklar uchun teng huquq hamda imkoniyatlarni taʼminlash, xotin-qizlarni tazyiq va zo‘ravonlikning barcha shakllaridan, shaʼni va qadr-qimmatini kamsitadigan harakatlardan himoya qilishga qaratilgandir. Navoiy kon-metallurgiya kombinati bo‘linmalarida mazkur qonunlarning targ‘ibot-tashviqotiga bag‘ishlangan tadbirlar o‘tkazildi. Ularda ayollarning jamiyatdagi va oiladagi mavqeini oshirish, ularning huquqlari buzilishining har qanday ko‘rinishlariga qarshi kurashish haqidagi fikr-mulohazalar ko‘tarilib, atroflicha muhokama etildi.

Joriy yilning yanvar oyida Navoiy mashinasozlik zavodida bo‘lib o‘tgan tadbirda shahar Xotin-qizlar qo‘mitasi raisi Shalola Hamidova, shahar Adliya bo‘limi bosh maslahatchisi Zafar Nasimovlar yig‘ilganlarni Qonunlarning mazmun-mohiyati bilan tanishtirdilar. NKMK Maʼnaviyat va maʼrifat markazi rahbari Xolmamat Raupov xalqimiz oilani muqaddas deb bilishi, shu bois oilalar mustahkamligiga erishish har birimizning burchimiz ekanligini alohida aytib o‘tdi. So‘zga chiqqanlar mamlakatimizda xotin-qizlar muammolarini hal etishga ko‘maklashish davlat siyosati darajasiga ko‘tarilganini taʼkidladilar.

NKMK Matbuot markazi.