• Yaratildi: 20.10.2022
• Yangilandi: 04.01.2023
• O'qildi: 3706

Kombinat hududiy tarmoqlararo sanoat yarmarkasida faol ishtirok etmoqda

2022-yil 20-21-oktabr kunlari Navoiy shahridagi "Gidro stanko servis" MChJning ishlab chiqarish zavodi binosidа konchilik va metallurgiya, elektrotexnika, energetika, kimyo sanoati va qurilish materiallari sohasi korxonalari ishtirokida hududiy tarmoqlararo sanoat yarmarkasi o‘tkazilmoqda. Mazkur yarmakada "Navoiy kon-metallurgiya kombinati" aksiyadorlik jamiyati ham ishtirok etmoqda.

Mazkur yarmarka tantanali ochilish marosimida "NKMK" AJ Boshqaruvi raisi – Bosh direktori Q.Sanaqulov so‘zga chiqib, kombinatda mahalliylashtirish dasturini izchil amalga oshirish, import o‘rnini bosuvchi raqobatbardosh mahsulotlar ishlab chiqarish, yangi turdagi mahsulot turlarini ko‘paytirish hamda sanoat kooperatsiyasini yanada kengaytirish borasida amalga oshirilgan keng ko‘lamli ishlar to‘g‘risida gapirdi.

Jumaladan, kombinat tomonidan mahalliy ishlab chiqaruvchilar o‘rtasida “mahsulotbay” kooperatsiya aloqalari yo‘lga qo‘yildi. Ilgari kombinat ehtiyojlari uchun import qilingan 405 mlrd so‘mlik mahsulotlar hozirda 26 ta mahalliy ishlab chiqaruvchi korxona tomonidan ishlab chiqarilmoqda. Mazkur 26 ta korxona so‘nggi uch yilda kichik korxonadan o‘rta ishlab chiqaruvchilar toifasiga o‘tdi va ish o‘rinlari soni 10 baravarga oshdi.

Bugungi kunda kombinat tajribasi sifatida tadbirkorlik subyektlarini amaliy qo‘llab-quvvatlashni nazarda tutuvchi “Shatakka olish” mexanizmi bo‘yicha ishlar izchil olib borilmoqda. Mahalliy ishlab chiqaruvchilar bilan birgalikda import qilingan mahsulotlarni o‘zlashtirish bo‘yicha ishlab chiqilgan “Yo‘l xaritalari” o‘z natijalarini bermoqda. Natijada, kombinat “shatakka olgan” korxonalarning iqtisodiy ko‘rsatkichlari tahlil qilinganida maʼlum bo‘ldiki, mahsulot ishlab chiqarish hajmi 2019-yilga nisbatan o‘rtacha 16-17 barobarga oshib, 330 dan ortiq yangi mahsulot turi o‘zlashtirildi.

Joriy yilning to‘qqiz oyida kombinatda 412 mlrd so‘mdan ortiq mahalliylashtirilgan mahsulotlar ishlab chiqarilib, 2021-yilning mos davriga nisbatan o‘sish surʼati 122,4 foizni tashkil etdi. Misol uchun, joriy yilda import o‘rnini bosuvchi 163 metr kubli sharli tegirmon ilk bor Navoiy mashinasozlik zavodida tayyorlandi. Bu esa 3 mln dollar valyuta mablag‘larini iqtisod qilish imkonini berdi. Yil yakuniga qadar 167 ta loyiha bo‘yicha 538 mlrd so‘mlik mahalliylashtirilgan mahsulotlarni ishlab chiqarish ko‘zda tutilgan.

Kombinat va mahalliy ishlab chiqaruvchilar o‘rtasida kooperatsiya aloqalari yildan-yilga kengayib bormoqda. 2022-yilning to‘qqiz oyida kombinat tarmoqlararo kooperatsiya doirasida mahalliy ishlab chiqaruvchilardan 3,6 trln so‘mlik mahsulotlar xarid qildi. Faqatgina o‘tgan yili mahalliy korxonalar quvvatlarida emulgator, gidravlik moy, reaktor aralashtirgichi, tirqishli g‘alvirlar, moy filtrlari, filtrlovchi plitalar, silfon kabi import o‘rnini bosuvchi yangi turdagi mahsulotlar o‘zlashtirildi.

Kelgusida ham sanoat kooperatsiyasini yanada kengaytirish ko‘zda tutilgan. Jumladan, joriy yilda o‘tkazilayotgan Respublika va hududiy sanoat yarmarkalari doirasida 2 trillion so‘mlik mahsulotlarni xarid qilish bo‘yicha shartnomalar tuzish rejalashtirilgan.

Hududiy tarmoqlararo sanoat yarmarkasi davom etmoqda.

“NKMK” AJ Matbuot xizmati.