• Yaratildi: 05.09.2022
• Yangilandi: 05.09.2022
• O'qildi: 3130

Taʼlim muassasalarda yangi o‘quv yili boshlandi

5-sentabr kuni, erta tongdan mamlakatimizning barcha taʼlim muassasalarida yangi o‘quv yili boshlanib, maktablar yana o‘quvchilarni o‘z bag‘riga oldi.

Jumladan, 2 400 nafardan ortiq o‘g‘il-qiz taʼlim olayotgan Navoiy shahridagi 1-maktabda ham Bilimlar kuni munosabati bilan bayram tadbiri bo‘lib o‘tdi. Tadbirda “Navoiy kon-metallurgiya kombinati” aksiyadorlik jamiyati Boshqaruvi raisi – Bosh direktori, senator Q.Sanaqulov ishtirok etib, maktab pedagogik jamoasi hamda o‘quvchi-yoshlariga o‘z tabrigini izhor etdi.

Tadbirda taʼkidlaganidek, O‘zbekiston Respublikasi Prezidenti Sh.Mirziyoyev tomonidan mamlakatimiz mustaqilligining 31 yilligi munosabati bilan 31-avgustda “Yangi O‘zbekiston” bog‘ida bo‘lib o‘tgan bayram shodiyonasida davlatimizning 2026-yilgacha Taraqqiyot strategiyasi doirasida yuksak marralarga erishishi uchun 5 ta asosiy vazifa belgilab berildi. Bu vazifalarning birinchisi sifatida taʼlim sohasida farzandlarimizning zamonaviy bilim va ko‘nikmalarni puxta egallashlari uchun eng qulay sharoitlar yaratish izchillik bilan davom ettirilishi alohida taʼkidlandi.

Buning uchun maktablarning o‘quv dasturlari, o‘qitish uslubi, darsliklar mazmuni tubdan qayta ko‘rib chiqiladi, ushbu tizim avval ilg‘or xorijiy mutaxassislar tomonidan ekspertizadan o‘tkaziladi va joriy etiladi. Natijada, Yangi O‘zbekiston maktab bitiruvchisi zamonaviy ko‘nikmalarni egallagan, axborot texnologiyalarini puxta o‘zlashtirgan, kreativ fikrlaydigan, mustaqil qaror qabul qila oladigan, dunyoqarashi keng shaxs bo‘lib  yetishadi.

Mazkur maktabda o‘z kasbining haqiqiy fidoiylari ishlagani bois, qo‘lga kiritilayotgan yutuqlar har qanday tahsinga munosibdir. Jumladan, taʼlim dargohini o‘tgan o‘quv yilida tugatgan 150 nafar bitiruvchidan 146 nafari yoki 99 foizi o‘qishga kirgani quvonchli natija, ustozlar mehnati mahsulidir.

Shuningdek, tadbirda ziyolilar, o‘quvchilar so‘z chiqib, o‘zlarining dil izhorlarini bildirishdi. Birinchi qo‘ng‘iroq sadosi esa o‘quvchilarni yangi o‘quv yiliga chorladi.

“NKMK” AJ Matbuot markazi.