• Yaratildi: 31.08.2022
• Yangilandi: 31.08.2022
• O'qildi: 479

Mustaqillik – yutuqlarimizning asosiy manbai

Hurmatli hamkasblar!

Qadrli faxriylar!

Mustaqillik – xalqimizga erkinlik va ozod hayot ato etgan, qadriyatlarimiz, tilimiz va dinimiz, yurtimizning yer osti boyliklariga ega bo‘lishini qaytarib bergan buyuk neʼmatdir.

Bu yilgi Mustaqillik bayramining xalqimiz tomonidan “Yangi O‘zbekistonda el aziz, inson aziz”, degan bosh g‘oyani o‘zida mujassam etgan shior asosida kutib olinayotganligi Yurtboshimiz  rahnamoligida izchillik bilan amalga oshirilayotgan xalqparvarlik siyosatiga to‘la hamohangligi bilan alohida ahamiyat kasb etmoqda. Zero, buning zamirida ulug‘ neʼmat – mustaqillik, shu muqaddas Vatanda o‘tayotgan tinch hayotimiz, farovon turmushimizning qadriga yetishdek ulug‘ g‘oya va maqsad mujassamdir.

Fursatdan foydalanib, shonli kombinatimizning ahil jamoasi va mehnat faxriylarini eng ulug‘, eng aziz bayramimiz – O‘zbekiston Respublikasi mustaqilligining o‘ttiz bir yilligi bilan samimiy tabriklayman.

Aziz do‘stlar!

Dunyodagi hozirgi shiddatli taraqqiyot davrida mamlakatimizni yana-da rivojlantirishga qaratilgan muhim va dolzarb vazifalarning tezkorlik bilan hal etilayotgani barcha sohalarda o‘z natijalarini berayotganiga guvoh bo‘lib turibmiz. Yurtimizning har bir hududi kun sayin yangilanib, ko‘rkam qiyofaga kirib bormoqda. Eng muhimi, erishayotgan muvaffaqiyatlarimiz zamirida jamiyatimizdagi osoyishtalik va totuvlik hal qiluvchi omil bo‘lib xizmat qilmoqda.

Yangi O‘zbekistonda boshlangan keng ko‘lamli islohotlar kon-metallurgiya sanoatining eng yirik korxonasi bo‘lgan kombinatimizda ham o‘zgarishlar davrini boshlab berdi. Kombinatni yana-da rivojlantirish, zamonaviy korporativ boshqaruv tizimini joriy qilish, raqobatbardoshlikni oshirish, mavjud ishlab chiqarish quvvatlarini kengaytirish va eng asosiysi, sohaga to‘g‘ridan-to‘g‘ri xorijiy investitsiyalarni jalb qilish maqsadida Prezidenti­mizning qarori bilan korxonamiz aksiyadorlik jamiyatiga aylantirildi.

Yangi boshqaruv tizimiga o‘tish o‘z-o‘zidan bo‘lmaydi. Bunda, albatta, qonunchilik talablari bilan jahon standarti talablariga javob beradigan kompaniya bo‘lishi kerak. Jumladan, xorijiy investorlar talablariga muvofiq, xalqaro auditorlik kompaniyasi ishtirokida Global tashabbuskorlik hisoboti (GRI) standartlariga asosan barqaror rivojlanish hisoboti (ESG) tayyorlandi. Joriy yilning 30 may kuni kombinat tarixida ilk marotaba 2021 yil uchun moliya­viy hisobotlarning to‘liq majmuasi Moliyaviy hisobotning xalqaro standartlariga muvofiq tayyorlandi. Hisobot “Deloyt va Tush” xalqaro audit kompaniyasi tomonidan auditdan o‘tkazildi va ijobiy xulosa olindi. Bu, kelgusida amalga oshiradigan ishlarimiz va jahondagi oltin qazib oluvchi kompaniyalar bilan raqobat qilishda muhim ahamiyatga egadir.

Qadrli hamkasblar!

Kombinatimiz aksiyadorlik jamiyat sifatida ish boshlaganiga yarim yildan oshgan bo‘lsa-da, erishgan natijalarimiz salmoqli. Kombinatda joriy yilning o‘tgan yetti oyida 33,6 trillion so‘mlik mahsulot ishlab chiqarildi. Byudjetga 18,5 trillion so‘mlik to‘lov amalga oshirildi. Inves­titsiya dasturi doirasida 295 million dollar o‘zlashtirildi. Mahalliylashtirish dasturi doirasida 327,8 milliard so‘mlik mahsulot ishlab chiqarildi.

Bunday salmoqli natijalar yangi ishlab chiqarish korxonalari ishga tushirilishi, yangi texnika va texnologiyalarning ishlab chiqarishga joriy etilayotganligi samarasi desak, ayni haqiqatdir. Keyingi ikki yilda zamonaviy texnologiyalarga asoslangan 5- va 7-gidrometallurgiya zavodlari hamda  2-gidrometallurgiya zavodida yiliga 12 million tonna maʼdanni qayta ishlaydigan “B” korpusi foydalanishga topshirilganligi korxonamiz jamoasining ulkan salohiyati va imkoniyatlaridan dalolat beradi.

Jahonning oltin bo‘yicha eng nufuzli tahlilchi tashkilotlaridan biri – KITCO xalqaro tahliliy markazi xulosasiga ko‘ra, “Muruntov” konining qatorasiga ikki yil davomida oltin qazib oluvchi konlar o‘rtasida birinchi o‘rinni egallashi mamlakatimiz va kombinatimiz uchun faxrdir. Kombinatimizning tajribali muhandis va malakali mutaxassislari, konda mehnat qilayotgan minglab kishilarning fidokorona mehnatlari tufayli bu natijalarga erishilmoqda. Ayni vaqtda “Pistali” koni negizida yiliga 4 million tonna oltin maʼdanini qayta ishlaydigan 6-gidrometallurgiya zavodining qurilishi jadal surʼatlarda olib borilmoqda.

To‘yga to‘yona bilan deganlaridek, kombinatimiz mustaqilligimizning 31 yillik bayramini yutuqlar bilan kutib olmoqda. Joriy yilning 5 avgustida “Balpantov” va “Tomdibuloq” konlarining oltinli maʼdanlarini qayta ishlash uchun 2-gidrometallurgiya zavodiga yetkazib berish maqsadida 35 kilometrdan iborat yangi temir yo‘l liniyasi ishga tushirildi. Mazkur temir yo‘l liniyasining  muhim ahamiyati shundaki, u o‘zimizning quruvchilar tomonidan barpo etildi. Hozirgi kunda “Turbay” koniga 53 kilometrlik temir yo‘l liniyasini qurish ishlari boshlab yuborildi.

Bugungi quvonchli kunlarda Chexiya davlatining  “Mine Construction Alliance s.r.o.” kompaniyasi bilan hamkorlikda olib borilgan ikki yillik samarali mehnat mah­­suli sifatida, O‘zbekiston konchilik sanoa­ti tarixida ilk bor “Zarmitan” sanoat maydonida “Skip” va “Klet” harakatlanadigan shaxtaning chuqurligi ming metrga yetkazildi. Bu yutuq eng ulug‘, eng aziz bayramga munosib sovg‘a bo‘ldi. Bu ishlar kombinat o‘z yo‘nalishida rivojlanish sari ilgarilab borayotganidan dalolatdir.

Hozirgi shiddatli taraqqiyot davrida kon-metallurgiya sohasini yana-da rivojlantirish bo‘yicha oldimizda muhim va dolzarb vazifalar turibdi. Xususan, kombinatni transformatsiya qilish jarayonlarini davom ettirish, xorijiy investitsiya­larni keng jalb etgan holda, yirik va istiqbolli loyihalarni amalga oshirish, yangicha fikrlaydigan zamonaviy kadrlarni tayyorlash borasida ko‘plab ishlarni amalga oshirishimiz kerak.

Mustaqillik bayrami munosabati bilan Yurtboshimiz farmoniga muvofiq bir guruh hamkasblarimiz davlatimizning yuksak mukofotlariga sazovor bo‘lishdi. Eng ulug‘, eng aziz bayram arafasida Markaziy kon boshqarmasi direktori Elmurad Xalikulov “Mehnat shuhrati” ordeni, “NKMK” AJ bosh geologi o‘rinbosari Ilhomjon Hamroyev  “Do‘stlik” ordeni, Janubiy kon boshqarmasi konchilik bo‘limi yetakchi muhandisi Akmal Jamonkulov va Markaziy kon boshqarmasi yong‘in qutqaruv qismi haydovchi-qutqaruvchisi Obidjon Abdullayev “Shuhrat” medali bilan taqdirlangani fidokorona mehnatlariga berilgan munosib bahodir. Mana shunday yuksak eʼtirofga sazovor bo‘lgan hamkasblarimizni chin dildan tabriklaymiz.

Navoiy kon-metallurgiya kombinatining ko‘pming kishilik jamoasi jonajon O‘zbekistonimiz iqtisodiyotini yana-da rivojlantirish yo‘lida  yakdil va ahillikda mehnat qilib, har qanday mashaqqatlarni mardona yengib o‘tadi hamda hech shubhasiz, ko‘zlangan marralarni sharaf bilan egallaydi.

Qadrli yurtdoshlar!

Barchangizni yana bir bor Mustaqillik bayrami bilan chin dildan tabriklab, sihat-salomatlik, ezgu ishlaringizda yutuq va omadlar, xonadoningizga tinchlik-xotirjamlik va fayzu baraka tilayman.

Mustaqilligimiz abadiy bo‘lsin!

Quvondiq SANAQULOV,

“Navoiy kon-metallurgiya kombinati” aksiyadorlik jamiyati

Boshqaruvi raisi – Bosh direktori, O‘zbekiston Qahramoni.