• Yaratildi: 24.08.2022
• Yangilandi: 06.09.2022
• O'qildi: 4062

O‘zbekiston konchilik sanoati tarixida ilk marotaba shaxta chuqurligi 1 000 metrga yetdi

O‘zbekiston Respublikasi davlat mustaqilligining 31 yilligi arafasida 24-avgust kuni Samarqand viloyati Qo‘shrabot tumani Zarkent qo‘rg‘onidagi “Zarmitan” sanoat maydonida qazish ishlari olib borilayotgan “Skip” va “Klet” harakatlanadigan shaxtaning chuqurligi 1 000 metrga yetganligiga bag‘ishlangan tadbir bo‘lib o‘tdi.

Tadbirda “Navoiy kon-metallurgiya kombinati” aksiyadorlik jamiyati Boshqaruvi raisi – Bosh direktori Q.Sanaqulov, Qo‘shrabot tumani hokimi D.Shakarboyev, kombinat va Janubiy kon boshqarmasi rahbar-xodimlari, mahalliy aholi, OAV vakillari ishtirok etishdi.

Tadbirda so‘z olganlar tomonidan mustaqillik bergan imkoniyatlar tufayli ushbu hududda so‘nggi yillarda amalga oshirilgan ishlar, yangi gidrometallurgiya zavodi, konlar, zamonaviy infratuzilma – Zarkent qo‘rg‘oni barpo etilgani, so‘nggi yillardagi misli ko‘rilmagan bu o‘zgarishlar hududni ijtimoiy-iqtisodiy rivojlantirish, konchilar farovon yashashi, yoshlar uchun munosib ish o‘rinlari yaratish, ishlab chiqarish ko‘rsatkichlarini oshirishga, istiqbolli loyihalarni amalga oshirish hamda har yili yangidan-yangi turli obyektlarni foydalanishga topshirishga ulkan imkoniyatlar yaratib berayotgani taʼkidlandi.

Chexiya davlatining “Mine Construction Alliance s.r.o.” kompaniyasi bilan hamkorlikda olib borilgan ikki yillik samarali mehnat mahsuli sifatida, nafaqat O‘zbekiston konchilik sanoati tarixida, balki O‘rta Osiyo tarixida ilk marotaba texnik jihatdan nihoyatda murakkab hisoblangan qazish ishlari olib borilayotgan “Skip” va “Klet” harakatlanadigan diametri 6,5 metr bo‘lgan shaxtaning chuqurligi 1 000 metrga yetdi. Bu yutuq Mustaqilligimiz 31 yillik bayramiga munosib sovg‘a bo‘ldi. Bu ishlar kombinat o‘z yo‘nalishida taraqqiyot sari ilgarilab borayotganidan dalolatdir.

Ayni paytda keyingi bosqichdagi ishlar davom ettirilmoqda. Loyihani 2023-yil mart oyida to‘liq yakunlash rejalashtirilgan. Bu kelgusida yer qaʼridan har yili 850 ming tonna maʼdanni yer yuzasigacha chiqarish imkonini beradi va maʼdan qayta ishlash uchun 4-gidrometallurgiya zavodiga yetkazib beriladi.

Tadbirda shaxtani qazish ishlarida faollik ko‘rsatgan bir guruh ishchi-xodimlarga “NKMK” AJ maʼmuriyati tomonidan “Konchilik shuhrati” ko‘krak nishonlari topshirildi.  

“NKMK” AJ Matbuot xizmati.