• Yaratildi: 23.12.2020
• Yangilandi: 13.05.2024
• O'qildi: 22286

Bizning yutuqlarimiz

2024-yil:

- Texnologik bo‘limi boshlig‘ining o‘rinbosari Ulug‘bek Ergashev “Foydali qazilmalarni boyitish” ixtisosligi hamda Yangi texnologiyalarni joriy etish bo‘yicha innovatsion markaz boshlig‘i Ulug‘bek Sharafutdinov “Kamyob, nodir va radioaktiv elemantlar texnologiyasi” ixtisosligi bo‘yicha professor ilmiy unvoniga sazovor bo‘lishdi.

- Davlat organlari va tashkilotlarida 2023-yilda ochiqlik bo‘yicha amalga oshirilgan ishlarning samaradorligi va natijadorligini baholashga qaratilgan “Ochiqlik indeksi”da “NKMK” AJ 84,7 ball bilan eng yuqori samaradorlik ko‘rsatkichlaridan birini qayd etib, 5-o‘rinni egalladi. Aksiyadorlik jamiyatlari kesimida esa NKMK 32 ta yirik sanoat korxonalari hamda kompaniyalar orasida 2-o‘ringa sazovor bo‘ldi.

 

- 2023-yil natijalari bo‘yicha davlat idoralari va tashkilotlarining korrupsiyaga qarshi kurashishdagi faoliyati samaradorligi reyting baholash natijalariga ko‘ra, “NKMK” AJning korrupsiyaga qarshi kurashish bo‘yicha faoliyati 89 ball bilan “yaxshi” deb topildi.  

 

2023-yil:

- Toshkent shahrida raqamli texnologiyalar sohasida o‘tkazilgan Markaziy Osiyodagi eng katta tadbirlardan biri – “ICTWeek Uzbekistan – 2023” AKT haftaligi doirasida “raqamli hukumat”ni qurishda faol ishtiroki bor, raqamlashtirishda samarali natija ko‘rsatgan davlat tashkilotlari va xo‘jalik boshqaruv organlari qatorida “Navoiy kon-metallurgiya kombinati” AJ “Raqamli texnologiyalarni joriy etish bo‘yicha eng yaxshi xo‘jalik organi” nominatsiyasida taqdirlandi.

- Kanadaning Kitco xalqaro tahliliy markazi 2023-yilning birinchi yarim yilligida dunyodagi Top-10 ta eng yirik oltin ishlab chiqaruvchi kompaniyalar ro‘yxatini eʼlon qildi. Mazkur ro‘yxatga ko‘ra, Navoiy kon-metallurgiya kombinati 5-o‘rinni egallab, oltin ishlab chiqarish bo‘yicha dunyoda yetakchilardan biri bo‘ldi.

- Tomdi tumanida Navoiy kon-metallurgiya kombinati tomonidan barpo etilgan zamonaviy 504 o‘rinli ixtisoslashtirilgan maktab-internati foydalanishga topshirildi.

- London oltin quymalari bozori assotsiatsiyasi (LBMA – London Bullion Market Association) tomonidan Navoiy kon-metallurgiya kombinatiga bozor talablariga to‘la rioya qilish borasida navbatdagi test sinovlaridan muvaffaqiyatli o‘tganligini tasdiqlovchi sertifikat taqdim etildi.

- Nurota tumani hududida joylashgan “Pistali” konida oltin tarkibli maʼdanlarni qazib olish va qayta ishlash majmuasi – 6-gidrometallurgiya zavodining birinchi tegirmon bloki ishga tushirildi.

- Kanadaning Kitco xalqaro tahliliy markazi 2022-yilda dunyodagi Top-10 ta eng yirik konlar ro‘yxatini eʼlon qildi. Mazkur ro‘yxatga ko‘ra, “Muruntov” koni o‘tgan yilda oltin qazib olish bo‘yicha dunyoda yetakchilardan biri bo‘ldi.

- O‘zbekiston Respublikasi konchilik va metallurgiya sanoati xodimlari kuni arafasida “Muruntov” ohaktosh konida 1-maydalab saralash majmuasi foydalanishga topshirildi. Ushbu kon zahiralarini o‘zlashtirish gidrometallurgiya zavodlarining ohakga bo‘lgan ehtiyojini qondirish imkonini beradi.

- Davlat organlari va tashkilotlarida 2022-yilda ochiqlik bo‘yicha amalga oshirilgan ishlarning samaradorligi va natijadorligini baholashga qaratilgan “Ochiqlik indeksi”da “NKMK” AJ 76,2 ball bilan eng yuqori samaradorlik ko‘rsatkichlaridan birini qayd etib, mazkur indeksning 5-pog‘onasini qo‘lga kiritdi. Mazkur indeksning aksiyadorlik jamiyatlari kesimida esa kombinat 22 ta yirik sanoat korxonalari hamda kompaniyalar orasida 1-o‘rinni egalladi.

- Markaziy kon boshqarmasida ishlab chiqarishning raqamlashtirilgan yagona boshqaruv markazi ishga tushirildi. 2-gidrometallurgiya zavodida joylashgan mazkur markazning asosiy vazifasi geologik-qidiruv ishlari, maʼdanni qazib olish, tashish va gidrometallurgiya zavodlarida qayta ishlash jarayonlarini to‘liq kuzatib borish, tahlil qilish va boshqarishdan iboratdir.

- Navoiy mashinasozlik zavodi Quymachilik sexida 25 tonnalik yangi zamonaviy metall eritish pech ishga tushirildi. Ushbu pech uchun zarur qoliplash uskunasi bevosita zavodda tayyorlanadi. Yangi pech Quymachilik sexi ishlab chiqarish quvvatini 30 foizga oshiradi yoki yiliga 40 ming tonnaga yetkazish imkonini beradi. 

- Nurota tumani hududida joylashgan “Pistali” konida birinchi portlash amalga oshirildi. Mazkur loyihaning ro‘yobga chiqarilishi kelgusida har yili 4 mln tonna maʼdanni qayta ishlash imkonini beradi. “Pistali” konidan yaqin kelajakda 40 mln tonnadan ziyod maʼdan qazib olish mo‘ljallanmoqda.

2022-yil:

- O‘zbekiston Respublikasi Prezidentining 2022-yil 12-dekabrdagi “O‘zbekiston Respublikasining fan va texnika, adabiyot, sanʼat va meʼmorchilik sohasidagi Davlat mukofotlarini berish to‘g‘risida”gi farmoniga muvofiq “Navoiy kon-metallurgiya kombinati” aksiyadorlik jamiyati mutaxassislari Quvondiq Sanaqulov, Nikolay Snitka, Rustamjon Usmanov, Ulug‘bek Ergashev va Otabek Mustaqimovlar “Texnologik va ishlanishi murakkab bo‘lgan oltin tarkibli maʼdanlarni qayta ishlash va o‘zlashtirishning kompleks texnologiyalarini ishlab chiqish va joriy etish” bo‘yicha ilmiy-amaliy ishlanmasi uchun fan va texnika sohasida birinchi darajali Davlat mukofoti bilan taqdirlandi.

- O‘zbekiston konchilik sanoati tarixida ilk marotaba “Zarmitan” sanoat maydonida shaxta chuqurligi 1 000 metrga yetdi.

- Tomdi tumani hududida “Tomdibuloq” konini 2-gidrometallurgiya zavodi bilan bog‘lovchi 35 kilometrlik temir yo‘l liniyasi foydalanishga topshirildi.

- Navoiy shahrida zamonaviy sport inshooti – gandbol zali foydalanishga topshirildi.

- O‘zbekiston Respublikasi Davlat aktivlarini boshqarish agentligi davlat ishtirokidagi korxonalarning moliyaviy hisobotlar tahlilini e’lon qildi. 2021-yil yakuni bo‘yicha moliyaviy hisobotlar tahlili natijasi ko‘ra, eng ko‘p sof foyda olgan va dividend to‘lagan korxona Navoiy kon-metallurgiya kombinati bo‘ldi.

- O‘zbekiston Respublikasi Moliya vazirligi tomonidan 2022-yil ko‘rsatkichlarini o‘z ichiga olgan "Fuqarolar uchun byudjet" nashri eʼlon qilindi. Ushbu nashrning 14-betida yirik soliq to‘lovchilarning O‘zbekiston Respublikasi Davlat byudjeti tushumlaridagi ulushining 2022-yil prognozi keltirilgan. Prognozga ko‘ra, "Navoiy kon-metallurgiya kombinati" aksiyadorlik jamiyatining ulushi 20,2 foizni tashkil qiladi.

- Kanadaning Кitсо xalqaro tahliliy markazi 2021-yilda dunyodagi Top-10 ta eng yirik konlar ro‘yxatini eʼlon qildi. Mazkur ro‘yxatga ko‘ra, “Muruntov” koni 2021-yilda oltin qazib olish bo‘yicha dunyoda yetakchi bo‘ldi. O‘tgan yili “Muruntov” konidan 2 mln unsiyadan ko‘proq oltin qazib olingan. 

- “NKMK” AJ tomonidan amalga oshirilayotgan investitsion loyihalar doirasida Tomdi tumani hududidagi “Balpantog‘” va “Tomdibuloq” konlarida birinchi portlatish ishlari amalga oshirildi va qazib olish ishlari boshlandi.

 

2021-yil:

- Zarafshon shahrida imkoniyati cheklangan bolalar uchun barpo etilgan zamonaviy maktabgacha taʼlim tashkiloti barcha qulaylik va sharoitlarga egadir. 72 o‘ringa mo‘ljallangan mazkur muassasaga asosan Zarafshon shahri, Uchquduq va Tomdi tumanlarida yashovchi, imkoniyati cheklangan bolalar qabul qilinadi. Maskan maxsus jihozlar, tibbiyot uskunalari bilan taʼminlandi. Mashg‘ulotlar guruhlarda, belgilangan dastur asosida olib boriladi. Uchta blokdan iborat ikki qavatli binoning ikkitasida liftlar o‘rnatilgan.

- 5-gidrometallurgiya zavodi qurilishiga davlatimiz rahbarining 2017-yil mart oyida viloyatimizga tashrifi chog‘ida tamal toshi qo‘yilgan edi. Zavodning 3 ta blok, 6 ta tegirmondan iborat loyihasi to‘liq yakunlangach, yillik ishlab chiqarish quvvati 5 mln tonnaga teng bo‘ladi va bu yerda uch yarim mingta yangi ish o‘rni yaratiladi. 2021-yilda zavodning dastlabki 2 ta tegirmoni qurib bitkazildi va mahsulot bera boshladi. 

- Markaziy kon boshqarmasida yiliga 15 mln tonna texnogen chiqindilarni qayta ishlash imkonini beruvchi 7-gidrometallurgiya zavodi ochilish marosimi bo‘lib o‘tdi. Qurilish “Uyumda eritmaga o‘tkazish sexi texnogen chiqindilarini qayta ishlash majmuasini qurish (7-GMZ)” loyihasi asosida amalga oshirildi. Mazkur loyihaning birinchi va ikkinchi bosqichi doirasida maʼdanni qayta ishlashga ixtisoslashgan to‘rtta tegirmon bloki muddatidan oldin ishga tushirildi. Zavod qurilishida qo‘llanilgan texnologik uskunalar asosan Navoiy mashinasozlik zavodida ishlab chiqarildi. 

- “Auminzo-Amantoy” koni va 5-gidrometallurgiya zavodi ishchi-xizmatchilari uchun Ishchilar shaharchasining 1,5 ming o‘rinli turar-joy va yotoqxonalari qurib bitkazildi. Jumladan, muhandis-texnik xodimlar uchun 16 o‘ringa mo‘ljallangan 4 ta turar-joy binosi va 14 ta yotoqxona foydalanishga topshirildi. Shaharchaning umumiy maydoni 9 gektar. Bu yerda ishchi-xodimlar uchun barcha shart-sharoitlar yaratilgan.

- “Muruntov” konida konni o‘zlashtirishning V-navbati investitsion loyihasi doirasida Shimoliy-sharqiy davriy oqim texnologiyasi majmuasi foydalanishga topshirildi. Uning umumiy quvvati soatiga 7 ming tonnani tashkil etadi. Majmua uchun zarur barcha konveyerlar Navoiy mashinasozlik zavodida tayyorlandi.

- “G‘ujumsoy” konida maydalash-saralash texnologik tizim va ko‘chma to‘ldirish qurilmasi foydalanishga topshirildi. Ushbu obyekt “G‘ujumsoy” konining ishlab chiqarish quvvatini yiliga 100 ming tonna (650 ming tonnagacha) ruda qazib olishga oshirish” investitsion loyihasi asosida barpo etilgan bo‘lib, kon hududlarida sodir bo‘layotgan yer sathining cho‘kishlarini oldini olish va texnika xavfsizligini taʼminlash uchun xizmat qiladi.

- “Zarmitan” konining “Asosiy” stvoli maydonida qurilgan shaxta ko‘tarish qurilmasi binosi va stvol kopyoridan iborat majmua ishga tushirildi. Buning natijasida “Asosiy” stvol gorizontlariga ishchi-xodimlar, yuklarni tushirish-ko‘tarish va qazib olingan maʼdanni yuqoriga tashish uchun qulayliklar yaratiladi. Endilikda 930 metr chuqurlikgacha tushish va yer quyi sathlaridagi zaxiralarni yuqoriga – yer ustki qismiga olib chiqish imkonini beradi.

2020 yil:

- 7-gidrometallurgiya zavodi quvvatlarini oshirishga qaratilgan investitsiya loyihasining birinchi va ikkinchi bosqichi doirasida 7-GMZda to‘rtta tegirmon bloklari ishga tushirildi. Zamonaviy texnologiyalarga asoslangan zavodda qayta ishlangan (texnogen) maʼdanlardan mahsulot olinadi. Korxona to‘la quvvat bilan ishga tushirilganidan keyin yiliga 15 mln tonna texnogen chiqindi qayta ishlanadi.  

- 2-gidrometallurgiya zavodining qayta ishlash quvvatlarini kengaytirishga qaratilgan investitsiya loyihasi doirasida 2-GMZda 29, 30-tegirmon bloklari ishga tushirildi. Mazkur bloklarning ishga tushirilishidan ko‘zlangan maqsad zavodda tarkibida oltin bo‘lgan maʼdanlarni qayta ishlash hajmini bosqichma-bosqich oshirib borishdir.  

- 2-gidrometallurgiya zavodining tayyor mahsulot sexi negizida oltin va kumushdan o‘lchovli quymalar ishlab chiqarish bo‘yicha zamonaviy yuqori texnologiyalarga asoslangan majmua ishga tushirildi.

- 2017 yilda Markaziy kon boshqarmasi “Auminzo-Amantoy” oltin koni negizida 5-gidrometallurgiya zavodini barpo etishga qaratilgan investitsiya loyihasi amalga oshirila boshlandi. Ayni paytda mazkur obyektda qurilish ishlari davom etmoqda. Zavodning birinchi bosqichi foydalanishga topshirilgandan so‘ng 2 mln tonna sulfidli maʼdanni qayta ishlash rejalashtirilgan. Korxona to‘la quvvat bilan ishga tushirilgach 5-GMZda yiliga 5 mln tonna maʼdan qayta ishlanadi.   

- Navoiy mashinasozlik zavodining quyish sexida qo‘lda qoliplash uchastkasi ishga tushirildi. Yangi uchastka konchilik uskunalari uchun po‘lat quyish hajmini yiliga 2000-2200 tonnaga oshirish imkonini berdi.  

- Qoraqalpog‘iston Respublikasi Taxiatosh tumanidagi Taxiatosh metall konstruksiyalar va nostandart jihozlar ishlab chiqarish zavodida metallarni ruxlash uchastkasi foydalanishga topshirildi. 

2019 yil:

- Shimoliy kon boshqarmasi 3-gidrometallurgiya zavodida yuqori texnologiyalarga asoslangan majmua – filtrlash, quritish va kuydirish sexi  foydalanishga topshirildi. Germaniyaning “Engineering Dobersek”  kompaniyasi bilan hamkorlikda barpo etilgan majmua “Ko‘kpatas” va “Dovg‘istov” konlarining tarkibida oltin bo‘lgan sulfidli maʼdanlarini qayta ishlash texnologiyasini takomillashtirishga qaratilgan. O‘zining ilg‘or muhandislik-texnik yechimlari, texnologik jihozlanish darajasiga ko‘ra bu majmua dunyoda noyobdir.

 

2018 yil:

- Janubiy kon boshqarmasi “G‘ujumsoy” konida chuqurligi 500 metr, aylanasi 6 metr bo‘lgan yangi shaxta ishga tushirildi. Shaxta ishga tushirilishi natijasida “G‘ujumsoy” konining loyiha quvvati 550 ming tonnaga yetdi.   

- 5-kon boshqarmasi 4-geotexnologik konida noyob va noyob yer elementlarini ishlab chiqarish bo‘limi foydalanishga topshirildi. Mazkur bo‘limda qo‘llanilayotgan ammoniy perrenatini (reniy) olish texnologiyasi innovatsion loyiha bo‘lib, NKMK mutaxassislari tomonidan ishlab chiqildi. Bo‘limda o‘rnatilgan asbob-uskunalarning 90 foizi mahalliylashtirish dasturi doirasida tayyorlandi. 

Xalqaro yutuqlar

2019 yil - London oltin quymalari bozori assotsiatsiyasi (LBMA – London Bullion Market Association) tomonidan Navoiy kon-metallurgiya kombinatiga bozor talablariga to‘la rioya qilish borasida navbatdagi test sinovlaridan muvaffaqiyatli o‘tganligini tasdiqlovchi sertifikat taqdim etildi.

2017 yil – O‘zbekiston Respublikasi kon-metallurgiya sanoati tarixida ilk marotaba Navoiy kon-metallurgiya kombinati mutaxassislari murakkab tarkibli, qayta ishlash qiyin bo‘lgan rudalardan oltin ajratib olishning yangi texnologiyasini yaratganliklari uchun Birlashgan Millatlar Tashkiloti Butunjahon intellektual mulk tashkilotining Oltin medaliga sazovor bo‘lishdi.

2017 yil – Navoiy kon-metallurgiya kombinati oltin kategoriyasida sifatni boshqarish tizimidagi yutuqlarni saqlab turish va takomillashtirish ishlariga qatʼiy rioya qilib kelayotganligi uchun Yevropa Sifat Tadqiqotlari Jamiyatining mukofotiga munosib ko‘rildi.

1999 yil – Ilg‘or texnologiyalar va konchilik sanoati Assotsiatsiyasi (Delaver shtati, AQSh) aʼzoligi sertifikati.

1998 yil – Jenevada o‘tkazilgan 26-Xalqaro salonining bronza medali.

1997 yil – Tokio xomashyo birjasi tomonidan NKMK oltiniga sifat sertifikati taqdim etildi.

1994 yil – London oltin quymalari bozori assotsiatsiyasining arbitraj laboratoriyasi tomonidan NKMK oltini “Optimal yetkazib berish” maqomiga sazovor bo‘ldi.