• Yaratildi: 06.02.2023
• Yangilandi: 23.05.2023
• O'qildi: 27658

Boshqaruv raisi - Bosh direktorning MUROJAATI

 

“Navoiy kon-metallurgiya kombinati” aksiyadorlik jamiyati xodimlariga

Boshqaruv raisi – Bosh direktorning

MUROJAATI

Aziz do‘stlar!

Qadrli hamkasblar!

Yangi O‘zbekiston, jonajon kombinatimiz kelajagi, demakki ulug‘ ajdodlarimizga beshik bo‘lgan yurt, farzandu-nevaralarimiz taqdiriga bevosita daxldor bo‘lgan masala hamda ularning adolatli yechimlari xususida sizlarga murojaat qilmoqchiman.

Bu – korrupsiyaga qarshi murosasiz kurashishdir.

Inson zoti borki, qalbini kindik qoni to‘kilgan zamin, Vatan atalmish muqaddas manzil-makonni obod qilish, xalqini baxtli va farovon ko‘rishdek ezgu niyat aslo tark etmaydi.

Shu maʼnoda murojaatimda ilgari surmoqchi bo‘lgan, g‘oyatda dolzarb
va masʼuliyatli masalalarda, siz ham befarq bo‘lmasligingiz, aksincha ular dilingizda aks sado berishiga – hammasini bittada aytadigan bo‘lsak, mushtni bir joyga urib, hamjihatlikda hal qilishimizga ishonaman.

Bugun mamlakatimizda Yangi uyg‘onish – Uchinchi Renesseansga mustahkam poydevor qo‘yilmoqda. Yangi O‘zbekistonda ro‘y berayotgan siyosiy, iqtisodiy, ijtimoiy yangilanish va o‘zgarishlar dunyo hamjamiyati, xalqaro ekspert hamda yetakchi siyosatchilar tomonidan chuqur eʼtirof etilmoqda.

Jamiyatda sodir bo‘layotgan demokratik jarayonlar, insonni qadrlash, uning dardu tashvishlarini hal etish, farovon turmushini taʼminlashga qaratilgan iqtisodiy islohotlarning natijalari odamlarning aql-idroki, ongu shuuri, dunyoqarashida o‘z aksini topayapti.

Biz jahonning rivojlangan mamlakatlar qatoridan o‘rin olishni maqsad qilgan va bunga erishish uchun barcha davlatlar bilan o‘zaro tinchlik
va manfaatdorlik asosida diplomatik, iqtisodiy, madaniy aloqalarni yo‘lga qo‘yayotgan Yangi O‘zbekistonda yashayapmiz.

Yurtboshimiz tomonidan yangicha fikrlash, yangicha ishlash va yangicha yashash shiori ilgari surilayotganligi bejizga emas. Bugun o‘n, besh, hatto bir yil ilgarigidek yashab bo‘lmaydi. Endilikda shiddatli davr talabi tamomila boshqacha va bu hech shak-shubhasiz ijtimoiy hayotimizning barcha jabhalarida korrupsiyaga qarshi kurashish bilan ham bog‘liq.

So‘nggi paytlarda respublika va jamiyat hayotining barcha sohalarida korrupsiyaga qarshi kurashish borasida katta saʼy-harakatlar amalga oshirilmoqda.

Prezident Shavkat Mirziyoyevning Oliy Majlis va O‘zbekiston xalqiga qilgan Murojaatnomasida bu masalaga alohida to‘xtalib: “Korrupsiyaga qarshi kurashish borasida alohida qonunlar qabul qilinib, huquqiy asoslar yaratildi, endi amaliy ishlarni kuchaytirish kerak. Sunʼiy monopoliyaga, yopiq sxemalarga, umuman korrupsiyaga imkon yaratadigan barcha bo‘shliqlarga barham beriladi”, deb taʼkidlandi.

Davlat rahbarining ushbu so‘zlari korrupsiyaga qarshi kurashish mutlaqo kechiktirib bo‘lmaydigan o‘ta dolzarb vazifa ekanligini ko‘rsatmoqda.

Bu borada jadal rivojlanish yo‘liga kirgan va katta muvaffaqiyatlarga erishgan davlatlar tajribasi ham buni yaqqol isbotlab turibdi.

O‘zbekistonda korrupsiyaga qarshi kurashish bo‘yicha olib borilayotgan islohotlarda uning oldini olish va profilaktika qilishga alohida eʼtibor qaratilmoqda. Bu borada ishlarni muvofiqlashtirish uchun kombinatimizda Komplayens xizmati tashkil etildi.

Bizning eng muhim vazifamiz – qimmatbaho metall ishlab chiqarish hajmini ko‘paytirish bilan birga xodimlarni korrupsiyaga qarshi huquqiy ongini oshirish hamda unga nisbatan murosasiz kurashishdir. Biz kombinat tizimida korrupsiyaga qarshi fuqarolik tashabbuslarini ijobiy qarshi olamiz va qo‘llab-quvvatlaymiz.

Biz har qanday muammoni hal qilishni o‘zimizdan boshlashimiz kerakligini tushunamiz. Negaki, korrupsiyaga oid huquqbuzarliklarni o‘z vaqtida oldini olish, aniqlash va ularga chek qo‘yish muhim hisoblanadi.

Aziz hamkasblar!

Kombinatimiz ishchi va xizmatchilari, muhandis-texnik xodimlari!

Biz zamonaviy boshqaruv tizimiga o‘tayotgan kombinatimizning barcha bo‘g‘inlarida korrupsiyaning har qanday ko‘rinishlariga qarshi qatʼiy kurash eʼlon qilganligimizni alohida taʼkidlamoqchiman.

Korxona rahbar va mutaxassislari endilikda iqtisodiy samaradorlik, mablag‘larning o‘rinli va maqsadli sarflanishi, bunda ochiqlik va shaffoflikni taʼminlash uchun shaxsan javobgar ekanligini tushunib yetishlari lozim.

Xorijiy hamkorlarimiz bilan aloqalarni mustahkamlash, xalqaro mavqe
va nufuzimizni oshirish masʼuliyati ham shuni taqozo etmoqda.

Umuman olganda, korrupsiyaga sezilarli zarba berish uchun, eng avvalo, kombinatda mazkur illatga qarshi murosasiz muhitni tashkil etish lozimdir. Buning uchun esa, barcha xodimlar o‘z huquq va burchlarini bilishlari bilan bir qatorda, unga shaxsan rioya qilishlari va boshqalardan ham shuni talab qilishlari lozimdir.

Shuning uchun, korrupsiyaviy holatlar bilan bog‘liq bo‘lgan takliflar, arizalar yoki shikoyatlari bo‘lgan har bir shaxsni befarq kuzatuvchi bo‘lib qolmasdan, balki kombinatning (79) 227-72-22 ishonch telefoniga xabar berish yoki yozma ravishda murojaat etish orqali o‘zining faol fuqarolik pozitsiyasini namoyish etishga chaqiramiz.

Biz har bir xabar belgilangan tartibda ko‘rib chiqilishiga, agar korrupsiyaviy huquqbuzarlik sodir etilganligi holati o‘z tasdig‘ini topgan taqdirda, aybdor shaxslar qonuniy jazoga tortilishini taʼminlaymiz.

Qadrli kombinatimiz ishchi-xodimlari!

Masʼuliyatni his qilgan holda ijtimoiy hayotda faol bo‘lishga, korrupsiyaga qarshi birga kurashishga chaqiramiz.

Quvondiq SANAQULOV,

“NKMK” AJ Boshqaruv raisi – Bosh direktori.