• Created: 20.01.2022
• Updated: 20.01.2022
• Read: 3700

A press tour to Navoi machine-building plant was organized for media representatives and journalists

2022-yil 20-yanvar kuni Navoiy mashinasozlik zavodida “Navoiy kon-metallurgiya kombinati” aksiyadorlik jamiyatida mahalliylashtirilgan mahsulotlar ishlab chiqarish, kooperatsiya aloqalari, importni maqbullashtirish yo‘nalishida olib borilayotgan ishlar natijadorligi bo‘yicha ommaviy axborot vositalari vakillari va jurnalistlar uchun press-tur va matbuot anjumani o‘tkazildi.  

Press-tur davomida OAV vakillari va jurnalistlar Navoiy mashinasozlik zavodining Quymachilik va Asbobsozlik sexlarida bo‘lib, korxonada ish jarayonlari va ishlab chiqarish quvvatlarini oshirish bo‘yicha olib borilayotgan amaliy ishlar bilan yaqindan tanishdilar hamda ishchi-xodimlar bilan suhbatlashdilar.

Navoiy mashinasozlik zavodi mamlakatimizdagi eng yirik mashinasozlik korxonasidir. Bu yerda, ayni paytda qariyb 4 ming nafar muhandis-texnologlar, metallurglar, mexaniklar, konstruktorlar va boshqa kasb egalari fidokorona mehnat qilishmoqda. Bugungi kunda NMZda ishlab chiqarilayotgan qariyb 15 ming turdagi metall va yog‘ochga ishlov beruvchi dastgohlar, yirik avtomobillar uchun murakkab detallar va boshqa yuqori sifatli mahsulotlar nafaqat mamlakatimiz korxonalari, balki xorijiy davlatlarga ham yetkazib berilmoqda.

Zavod ishlab chiqarish quvvatlarini oshirish doirasida “Mexanik yig‘uv sexini texnik va texnologik qayta jihozlash” loyihasi amalga oshirilmoqda. Mazkur loyiha bo‘yicha bugungi kunda sexning yangi binosi qurilishi yakunlanish arafasida. Hamda zamonaviy, samaradorligi yuqori dastgohlar olib kelinib, ishga tushirishga tayyorlanmoqda. Shu bilan birga, kombinat bo‘linmalarida sharli tegirmonlar va kon-shaxta uskunalari uchun Quymachilik sexida ishlab chiqarilgan mahsulotlar hajmini oshirish uchun quyma mahsulotlari hajmini 2026-yilga kelib 40 ming tonnaga yetkazish rejalashtirilgan. Hozir quymachilik sexida qurilish va rekonstruksiya ishlari jadal surʼatlarda olib borilmoqda. Jumladan, 25 tonnalik metall erituvchi pech, zamonaviy pnevmotransportyorlar, qoliplash mashinalari, 25 taga yaqin nostandart jihozlar NMZda ishlab chiqarilib, o‘rnatildi.

2022-2024-yillarda kombinat Investitsiya dasturi doirasida NMZda dastgohsozlik sohasini rivojlantirish bo‘yicha qo‘shimcha 28 ta zamonaviy, yuqori aniqlikdagi dasgohlarni xarid qilish rejalashtirilgan. Kelajakda chet el kompaniyalari bilan hamkorlikda kooperatsiya yo‘nalishida zamonaviy, jahon talablariga mos keladigan raqamli dasturlash boshqaruviga ega dastgohlarni ishlab chiqarish va 200 ta yangi ish o‘rinlarini yaratish rejalashtirilgan.

“NKMK” AJ matbuot xizmati.