• Created: 26.05.2021
• Updated: 27.05.2021
• Read: 3814

Journalists got acquainted with activity of Mining administration №5

5-kon boshqarmasi Navoiy kon-metallurgiya kombinatining yetakchi sanoat korxonalaridan biri hisoblanadi. Ayni paytda korxona ishchi-xodimlari kombinat ravnaqi, yurtimiz iqtisodiyotini yuksaltirish yo‘lida fidokorona mehnat qilib kelayapti. Bugun jamoa eʼtirofga loyiq ishlari va erishayotgan yutuqlari bilan har qancha faxrlansa arziydi. Bunday muvaffaqiyatlar jurnalistlarni ham qiziqtirib kelmoqda. 26 may kuni mazkur kon boshqarmasiga ommaviy axborot vositalari vakillari uchun press-tur va matbuot anjumani tashkil etildi. Bu tadbirda ijodkorlar bevosita ishlab chiqarish jarayonlari bilan tanishib, ko‘plab maʼlumotlarga ega bo‘lishdi.

Sir emas, Qizilqum sahrosining murakkab iqlim sharoitida mehnat qilish, sahro injiqliklariga chidashning o‘zi katta jasorat va qahramonlikdir. Bu, hech shubhasiz, har bir insondan mustahkam iroda va sabr-bardosh talab etadi. Lekin kon boshqarmasi zahmatkashlari har qanday qiyinchiliklarni mardonovor yengib, nimalarga qodirligini  amalda isbotlab kelayapti. Shu sababli ham cho‘l darg‘alari mehnati har jihatdan quvonarli, tasannolar aytishga arzigulikdir.

Yaqinda kon boshqarmasi o‘zining shonli 50 yilligini keng nishonladi. Press-tur doirasida jurnalistlar dastlab Taʼmirlash-mexanika sexida bo‘lishib, ishlab chiqarish jarayonlari bilan tanishdilar. Soha mutaxassislari, fidoiylari, yoshlar va xotin-qizlar vakillari bilan qizg‘in muloqotga kirishib, suhbatlashish imkoniga ega bo‘ldi.

- Ochig‘i, jurnalistik faoliyatim davomida kombinat bo‘linmalariga birinchi kelishim. Ular mehnati haqida ko‘p eshitganman. Lekin ko‘z bilan ko‘rgan boshqacha ekan. Menda bu tashrif o‘zgacha taassurot qoldirdi. Yoshlar, xotin-qizlar, bir so‘z bilan aytganda, shu zamin qorako‘zlarining zamonaviy texnologiyalar, uskunalarni mahorat bilan boshqarayotganiga qoyil qoldim. Eng muhimi, ulardan har birining nigohida g‘ayrat-shijoat ishtiyoqi, tanlagan kasbidan mamnunligi yaqqol sezilib turibdi. Mening nazdimda kombinat jamoasi mana shunday shijoatli mutaxassislar, olovqalb yoshlardan tarkib topgan va korxona yutug‘ini shunda deb bilaman, - deydi hayajonini yashira olmay viloyat radiosi muxbiri Farog‘at Barnoyeva.

Jurnalistlar cho‘lga uzukka ko‘z qo‘ygandek yarashiqli Zafarobod qo‘rg‘oniga kirib borar ekan, konchilar maskanining meʼmoriy qiyofasi mehmonlarni o‘ziga maftun etdi. Ijodiy guruh zamonaviy infratuzilmani o‘zida mujassam etgan “Yangi hayot” sog‘lomlashtirish majmuasida bo‘lishib, u yerdagi sport va sog‘lomlashtirish, madaniyat va sanʼat yo‘nalishlarida yaratilgan shart-sharoitlar bilan tanishdilar.

Shundan so‘ng jurnalistlar uchun “Yoshlik” madaniyat va sport markazi majlislar zalida “5-kon boshqarmasi tashkil topganligiga - 50 yil!” mavzusida matbuot anjumani bo‘lib o‘tdi. Anjuman avvalida tadbir ishtirokchilari uchun kon boshqarmasi faoliyatiga doir videolavha namoyish etildi.

Matbuot anjumanida 5-kon boshqarmasi direktori V.F.Nazarovning maʼruzasi tinglandi.

Darvoqe, bu korxona uran ishlab chiqarishga ixtisoslashgan. Hozirda 25 millat va elat vakillaridan tarkib topgan jamoada 4,8 ming nafardan ziyod ishchi-xodim fidokorona mehnat qilmoqda. Jamoaning azmu shijoati bilan so‘nggi yillarda mahsulot ishlab chiqarish hajmi, burg‘ilash ishlari, mahsuldor eritmalarni qayta ishlash, ammoniy perrenat ishlab chiqarish hajmi oshib borayapti. Ayni paytda boshqarma tarkibida to‘rtta geotexnologik kon mavjud bo‘lib, ular tomonidan 14 ta konda maʼdan qazib olish ishlari amalga oshirilmoqda. 2026 yilga qadar yana beshta yirik konni o‘zlashtirish ko‘zda tutilgan.

Mazkur tadbirlar ishtirokchilari bo‘lgan OAV vakillari va jurnalistlar olam-olam taassurotlar bilan qaytishdi.

NKMK Matbuot markazi.