• Создано: 17.05.2024
• Обновлено: 17.05.2024
• Прочитано: 1242

Bayramingiz muborak, aziz hamkasblar!

19-may – O‘zbekiston Respublikasi konchilik va metallurgiya sanoati xodimlari kuni

Aziz hamkasblar, qadrli mehnat faxriylari!

Avvalo, siz azizlarni, sizlar orqali o‘z hayotini mamlakatimiz kon-metallurgiya sohasi ravnaqiga bag‘ishlagan barcha hamkasblarimizni - O‘zbekiston Respublikasi konchilik va metallurgiya sanoati xodimlari kuni bilan chin qalbimdan tabriklayman.

Qizilqum kengliklarining murakkab iqlim sharoiti, butun dunyoda bo‘layotgan beqaror iqtisodiy va siyosiy vaziyatga qaramasdan, barcha sinov va qiyinchiliklarni mardonavor yengib o‘tib, yer osti boyliklarini qazib olish va qayta ishlash bo‘yicha oldimizga qo‘yilgan rejalarni ortig‘i bilan bajarayotganligimiz, bu – chinakam jasorat namunasidir.

Muhtaram Prezidentimiz Sh.M.Mirziyoyev ta’kidlab o‘tganlaridek, sizlarning fidokorona mehnatingiz bilan bepoyon Qizilqum bag‘ridan qazib olinayotgan, dunyo miqyosida yuksak e’tirof etilayotgan oltin va boshqa qazilma boyliklar mamlakatimiz iqtisodiy taraqqiyotini ta’minlashda beqiyos strategik ahamiyatga ega bo‘lmoqda.

Keyingi yillarda O‘zbekistonda amalga oshirilayotgan keng ko‘lamli islohotlar kon-metallurgiya sanoati uchun yangi davrni boshlab berdi. Davlatimiz rahbari tashabbusi bilan qabul qilingan kombinatni rivojlantirish dasturlari o‘z natijalarini bermoqda. Bu borada Yurtboshimiz tomonidan tasdiqlangan 2017-2026-yillarda kombinatni strategik rivojlantirish dasturi har jihatdan ahamiyatlidir. Bu dastur asosida amalga oshirilgan ishlar, investitsion loyihalar yangi quvvatlarni ishga tushirish va korxonalarni modernizatsiya qilish, xomashyo bazasini yanada kengaytirish imkonini berdi, korxonamizda ma’dan qazib olish va qayta ishlash sur’atini oshirib, barqaror rivojlanish muhitini vujudga keltirdi. Quvonarli jihati, ilm, izlanish, mashaqqatli mehnat, kadrlar salohiyati bilan erishilgan bu yutuqlar kombinat tarixida ilgari kuzatilmagan eng katta marra bo‘ldi. Buning hisobiga kombinat zamonaviy texnika va texnologiyalarga ega, to‘la raqamlashtirilgan, yetakchi kompaniyalar bilan bemalol raqobatlasha oladigan korxonaga, sanoat klasteriga aylandi.

Yangi quvvatlar – 5, 6 va 7-gidrometallurgiya zavodlari, 2-gidrometallurgiya zavodining ikkinchi navbati ishga tushirilishi evaziga metallurgiya sanoatida ma’danni qayta ishlash hajmi 100 million tonnadan oshdi.

Kasb bayrami nishonlanayotgan shukuhli kunlarda dasturlar ijrosi muddatidan ancha ilgari sharaf bilan uddalanayotganligi, bu, kombinatimiz ahil jamoalari matonatli mehnati samarasi ekanligini e’tirof etish hamda fidokorona xizmatlaringiz, yuksak vatanparvarligingiz uchun barchangiz va har biringizga cheksiz minnatdorchiligimni izhor etish menga alohida baxtiyorlik va mamnuniyat bag‘ishlamoqda.

Keyingi bir yilda Nurota tumanidagi “Pistali” koni negizida 6-gidrometallurgiya zavodi va Navoiy mashinasozlik zavodida zamonaviy tegirmonlar ishlab chiqaradigan sex ishga tushirildi. Joriy yilda 3-gidrometallurgiya zavodida yiliga 2 million tonna ma’danni qayta ishlash quvvatiga ega 2 ta yangi tegirmon bloki barpo etilmoqda. Yangi tegirmon bloklarining ishga tushirilishi korxonada ma’danni qayta ishlash hajmini 10 million tonnaga yetkazish, yarim tayyor mahsulot ishlab chiqarishni 12 foizga oshirish imkonini beradi.

Hozirgi shiddatkor zamonda yuqori texnologiyalarga asoslangan ishlab chiqarish rivojlanib, global raqobat kuchaymoqda. Buning natijasida, har bir sohada innovatsion texnologiyalarga asoslangan yangiliklar yaratish hayotiy zaruratga aylanmoqda. Ekspertlar fikricha, insoniyat kelajakda foydali qazilmalarning ko‘plab turlari, jumladan, strategik zaxiralarni to‘ldirish muammosining jiddiy kuchayishiga duch kelishi mumkin. Muammolarni muvaffaqiyatli hal etish ko‘p jihatdan ilm va izlanishlar samarasi, ularni ishlab chiqarishga joriy etish darajasiga bog‘liq. Bu esa o‘z-o‘zidan ushbu masalaga innovatsion va zamonaviy yondashuv, ilmiy-tadqiqotlarga zo‘r berishni talab etadi. Bu borada kombinat olimu mutaxassislari tinimsiz izlanishlar olib borib, e’tirofga arzigulik natijalarga erishib kelayotganini yaxshi bilasiz.

Kasb bayramini har doimgidek ulkan natijalar bilan qarshi olayapmiz. Joriy yilning o‘tgan to‘rt oyida qariyb 27 trillion so‘mlik mahsulot ishlab chiqarilib, belgilangan reja ortig‘i bilan bajarildi. Investitsiya dasturi doirasida 254 million dollarlik mablag‘lar o‘zlashtirilib, mahsulot tannarxini 812 milliard so‘mlikdan ziyodroqqa kamaytirildi. 292,6 milliard so‘mlik mahalliylashtirilgan mahsulotlar ishlab chiqarildi. Erishilgan bu marrada, hech shubhasiz, ahil jamoamiz har bir vakilining munosib hissasi bor, albatta.

Ma’lumki, O‘zbekistonning 2030-yilgacha bo‘lgan strategiyasida kon-metallurgiya sanoati korxonalari oldiga katta vazifalar qo‘yilgan. Jumladan, 2030-yilga borib O‘zbekistonda yuqori daromadli mahsulot uchun zarur bo‘lgan mis ishlab chiqarishni 3,5 barobar, oltinni – 1,5 barobar, kumushni – 3 barobar, uranni – 3 barobar oshirish mo‘ljallangan. Shu bois, oldimizda yanada yuksak marralar turibdi. Xabaringiz bor, ayni paytda davlatimiz rahbari tashabbusi bilan 2024-2030-yillarda kombinatni barqaror rivojlantirish dasturi ishlab chiqilmoqda. Ushbu dasturda kelgusida kombinatda ishlab chiqarish hajmini yana 30 foizga oshirish vazifasi belgilanishi nazarda tutilmoqda. Bu, har birimizdan yanada hamjihatlikda, yuksak mas’uliyat va fidoyilik namunasini ko‘rsatib ishlashni talab etadi.

Ishonamanki, jamoamiz bor kuch-g‘ayrati, bilim va tajribasini safarbar etib, bu sharafli vazifani ham muvaffaqiyatli bajaradi.

Aziz hamkasblar!

Fursatdan foydalanib, sizlarni yana bir bor qutlug‘ sana - O‘zbekiston Respublikasi konchilik va metallurgiya sanoati xodimlari kuni bilan chin qalbimdan tabriklayman. Sizlarga sog‘lik-salomatlik, oilaviy tinchlik-xotirjamlik, xonadonlaringizga fayz-baraka tilayman.

Quvondiq SANAQULOV,
“Navoiy kon-metallurgiya kombinati” AJ
Boshqaruv raisi – Bosh direktori.

“Konchilar hayoti” gazetasining 2024-yil 16-maydagi 9-soni