• Создано: 05.04.2023
• Обновлено: 05.04.2023
• Прочитано: 1991

Referendumda konchilar ham faol ishtirok etadi

5-aprel kuni “Navoiy kon-metallurgiya kombinati” aksiyadorlik jamiyatida “O‘zbekiston Respublikasi Konstitutsiyasi to‘g‘risida”gi Konstitutsiyaviy qonuni loyihasining mazmun-mohiyati targ‘ibotiga bag‘ishlangan seminar o‘tkazildi.

Seminarda Oliy Majlis Qonunchilik palatasi spikeri Nuriddin Ismoilov, Qonunchilik palatasi va xalq deputatlari Navoiy viloyat Kengashi deputatlari, kombinat rahbariyati va xodimlari hamda videokonferens aloqa orqali korxona bo‘linmalarida tashkil etilgan studiyalarda 2 ming nafarga yaqin ishchi-xodimlar ishtirok etishdi.

Tadbirda Qonunchilik palatasi spikeri Nuriddin Ismoilov, Qonunchilik palatasining Innovatsion rivojlanish, axborot siyosati va axborot texnologiyalari masalalari qo‘mitasi raisi Ilhom Abdullayev, Qonunchilik palatasi deputatlari Kozimjon Tojiyev va Aqshagul Tulegenovalar so‘zga chiqib, mamlakatimizning yangi tahrirdagi Konstitutsiyasiga kiritilgan normalar va konseptual o‘zgartishlar, yangilanayotgan bosh qomusimizning mamlakatimiz rivojlanishidagi tarixiy ahamiyati haqida batafsil maʼlumot berdilar. 

  

Maʼruzalarda taʼkidlanganidek, Konstitutsiyaviy qonun loyihasi bilan amaldagi Konstitutsiyamizning moddalari 128 tadan 155 taga, uning normalari esa 275 tadan 434 taga ko‘paymoqda. Konstitutsiyamiz qariyb 65 foizga yangilanib, amaldagi 128 ta moddadan 91 tasiga konseptual o‘zgartirishlar kiritilmoqda.   

Tadbirda bir guruh kombinat xodimlari Konstitutsiyaviy qonun loyihasi yuzasidan o‘z fikr-mulohazalarini bildirib, joriy yilning 30-aprel kuni bo‘lib o‘tadigan referendumda faol ishtirok etishlarini taʼkidladilar.

“NKMK” AJ Matbuot xizmati.