• Создано: 12.10.2022
• Обновлено: 13.10.2022
• Прочитано: 2118

“Xalqaro qishloq ayollari kuni”ga bag‘ishlangan tadbir o‘tdi

Birlashgan Millatlar Tashkiloti Bosh assambleyasining 2007-yil 18-dekabrda qabul qilingan “Qishloq hududlarida ayollarning ahvolini yaxshilash” to‘g‘risidagi rezolyutsiyasiga asosan 15-oktabr – Xalqaro qishloq ayollari kuni sifatida nishonlanib kelinayapti.

Shu munosabat bilan “Navoiy kon-metallurgiya kombinati” aksiyadorlik jamiyati  bo‘linmalari tadbirlar tashkil etilayapti. Tadbirlarda qishloq xo‘jaligini rivojlantirish,oziq-ovqat xavfsizligini taʼminlashga munosib hissa qo‘shayotgan ayollarimiz, opa-singillarimizning fidokorona mehnatlari eʼtirof etilmoqda.

Bugun Karmana tumanidagi “Deggaron” mahallasidagi "Ato Bo‘tayev" fermer xo‘jaligida ana shunday tadbirlar bo‘lib o‘tdi. Unda paxta yig‘im-terimida faol qatnashgan bir guruh xotin-qizlar kombinat maʼmuriyati va NKMK kasaba uyushmasi Kengashi tomonidan esdalik sovg‘alari bilan taqdirlandilar. Yurt xirmonini yuksaltirish, xalq farovonligini yana-da oshirish yo‘lida paxta dalalarida javlon urayotgan xotin-qizlar, opa-singillar bilan dildan suhbatlashildi.

 “Farhod” madaniyat saroyining “Sardoba” folklor jamoasi hamda xushovoz xonandalari tomonidan ijro etilgan jozibali kuy-qo‘shiqlar paxtakorlarga yaxshi kayfiyat bag‘ishladi.

Hafta davomida bunday xayrli tadbirlar tashkil etilib, kombinatimiz bo‘linmalari joylashgan hududlardagi qishloq va ovul ayollari holidan xabar olinadi – deydi NKMK Ayollar kengashi raisi Sabohat Nazarova.

“NKMK” AJ Matbuot xizmati.